Muqdishow Nasiibkeed, Maantuu u wacanyahay (MAANSO)

Filed under: Features |

Waxaan qoray Tixdan Maanso ee aan ugu magac daray Muqdishow Nasiibkeed, Maantuu u wacanyahay, Goor habeen ah, anigoo Maraya mid ka mida Wadooyinka Caasimadda.

Halkan ayaan ku dhashay kunasoo barbaaray, waxaana iminka ii muuqanaya wax aad uga duwan wixii aan Magaalada kusoo bartay ee ahaa inaanay Dadku ku dhiiran karayn socod Habeennimo, Colaadihii jiri jiray awgood.

Sidaas darteed baan u jecleystay inaan wax un ugu darsado Sheekooyinka wanaagsan ee ay Dhawaanahan Dalka iyo Xaalkiisa Maanta ka sheegayeen Af-Maalka Soomaaliyeed iyo inta kale ee ka hadashay oo Caalamka ahba.

Waa tanaa Tixdii ee Aqris wacan:

1- Muqdishaa la oran jiray

Waa Makaanki Dhalashiyo

Meeshi aan kusoo koray

Wali Magaci baa jira

Muuquse ka duwan sidi

Maalmo horeba la ogaa

Maantiyo Sideey tahay

Magaaladiyo Xaalkeed

Maaha Shalay wixii jiray

Marqaatina waxaa u ah

Maalin maaha iminkoo

Waa Habeen mugdi ahoo

Mir-dhexaad la joogo

Muqdishaan ku suganahay

Halkii Maalmo tagay iyo

Mudo badan Colaaduhu

Marti-galin jireen baan

Iyadoo Maqsuudoo

Nabad Caano maashay

Haatan meel la joogaa

 

2- Markii hore Habeenkii

Mugdigoon imaanoo

Gabalkiiba muuqdeey

Muqdishow Albaabada

Mar quraa xirxiran jidhay

Maqribkoo la adamayo

Masjid looma kici jidhin

Maqsinkiyo Qolkiisuu

Mid kastaba ku tukan jiray

Maafiyada Tuugta ah

Ayaa miririqleyn jidhay

Midkii ay arkaanna

Mindi Dheer ku suri jiray

Maryahana ka furan jiray

 

3- Maantase waxaa yimi

Markuu Gabalku dhaco baan

Miisaanka Dhuxushiyo

Maanabooliyada Shibis

Iyo Makaanka Siinaay

Inta socod kusoo maro

Xarar-yaale baal maro

Madiiniyo dhankaa shishe

Macmacaanka Ruux jira

Maalin-joog ku booqdoo

Marka Leylka soo galo

Anigoon murgooneyn

Mudo kale lasii jiro

Markaan Sheeko boganana

Mid kastaba halkiisii

Dib usoo majeertaa

Mid Gawaari raaciyo

Ku lugtiisa Maalaba

Mugdigaa Habeenkii

Marna Raad ma yeeshoo

Meel kastaba Dariiqyada

Leyrar baa ku mudanoo

Ileys baa ku miisan

Tuug Magaci waa ba’ay

Mooryanna lama arag

Muqdishow Nasiibkeed

Maantuu u wacan yahay

Deyr bay mareysaa

Xumihii iska meyrtay

Ilaah baa Mahadaas leh

 

4- Mar kalaan oranayaa

Muqdishoo Aleeyl Dumay

Ama Maalin dhalaalkeed

Midna aanu mid doorin

Dadku Murug la’aantood

Howsha maamulaayaan

Mucjiso weeye maan oran?

Ma dadaal la galay iyo

Nabad lagu maqnaayoo

Midig lagu haleelaa

Micnuhuba noqonayaa?

Mise waa la daaloo

Shacabkoo madfaca nacay

Iyo Dowladdoo miciinsatay

Ayaa Guusha Makaniyay

Colaadii Madaxa jaray

Nabadana dib u milkiyay?

Mid kastooy ahaataba

Muqdishow Nasiibkeed

Maantuu u wacan yahay

Deyr bay mareysaa

Xumihii iska meyrtay

Ilaah baa Mahadaas leh

 

 

W/ CURIYAY: Mohamed Abdullahi Dhaaley

Mohammed_dhaley@hotmail.com

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>