Nairobi 08.Feb 2014 (SDN)- Madaxweynaha dalka Kenya Uhuru Kenyatta ayaa sheegay in aysan u oggolaan doonin xarumaha lagu cibaadeysto in loo isticmaalo in dhallinyarada lagu baro asal-raacnimada xagga diinta ah.
Hadalka Madaxweynaha Kenya ayaa ka dambeeyay kaddib markii shalay oo Jimco ahayd masjidka Musa ee magaalada Mombasa ay dib uga soo cusboonaadeen isku dhacyo u dhaxeeya ciidamada booliska iyo qaar ka tirsan dadka ku cibaadeysta masjidka.
Uhuru Kenyatta ayaa sheegay in aysan u oggolaan doonin goobaha lagu cibaadeysto ee dalka Kenya oo ay ku jiraan macbadyada Hinduuga, masaajidda Muslimiinta iyo kaniisadaha Kirishtaanka in loo isticmaalo goobo asal-raacnimo oo halis lagu geliyo nolosha dadka Kenyaanka ah.
Iska hor imaadyo toddobaadkii hore booliska Kenya iyo koox dhallinyaro ah ku dhexmaray masjidka Musa ee Mombasa ayaa waxaa ku dhintay 2 qof, wuxuuna boolisku qabtay 100 qof oo lagu eedeeyay inay ka tirsan yihiin Al-Shabaab.
Nairobi SDN.
Qurbejoog.com
