Muqdisho (QJ) – Wajigii afaraad ee wada-hadallada lagu dhexdhexaadinayo madaxweynaha Soomaaliya Xasan Sheekh Maxamuud iyo madaxda mucaaradka ayaa maanta oo Arbaca ah la soo gebagebeeyey iyadoo aan weli xal laga gaarin xiisadda dastuuriga ah, taasoo sare u qaadeysa cabsida laga qabo in mar kale ay soo cusboonaato xiisadaha siyaasadeed.
Kulanka oo ka dhacay Villa Somalia oo uu gar-wadeen ka ahaa Madaxweynihii hore Sheekh Shariif Sheekh Axmed, ayaa ku soo dhamaaday is afgarad iyo in la sii ambaqaado wada xaajoodyada. Weli, wax horumar ah oo la taaban karo lagama samayn wax-ka-beddelka dastuurka ee lagu muransan yahay.
Hogaamiyayaasha mucaaradka ayaa ku adkeysanaya dalabkooda ah in gabi ahaanba laga noqdo isbedelada dastuuriga ah ee dhawaantan, gaar ahaan kuwa saameeya doorashooyinka madaxtinimo iyo awoodaha ra’iisul wasaaraha.
Madaxweyne Maxamuud ayaa la sheegay in uu u soo jeediyay in uu dib u eegis ku sameeyo wax ka bedelka qaar balse waxa uu diiday in uu si buuxda u bedelo, isaga oo codsaday in la siiyo waqti dheeri ah oo wadatashi ah.
Ismariwaaga ayaa salka ku haya isbadalka muranka dhaliyay ee lagu sameeyay cutubka 4-aad ee dastuurka KMG ah ee Soomaaliya.
Mucaaradka ayaa taageero ka helaya dowlad goboleedyada sida Puntland iyo Jubaland.
Khilaafkan ayaa imaanaya iyadoo Soomaaliya ay isku diyaarinayso doorashadii ugu horreysay oo toos ah muddo tobanaan sano ah.
Labada dhinacba waxay ku heshiiyeen in dib la isugu soo laabto toddobaadka soo socda, inkastoo hoggaamiyeyaasha mucaaradka ay ka digeen inay ka bixi karaan wadahadallada haddii aan wax horumar ah laga gaarin. Dadka wax indha indheeya ayaa ka cabsi qaba in xasilooni darida daba dheeraatay ay carqalad ku noqon karto waqtiga doorashada Soomaaliya iyo howlgalada socda ee lagu xaqiijinayo amniga ee ka dhanka ah maleeshiyada Al-Shabaab.
Beesha Caalamka, oo ay ku jiraan QM iyo Midowga Afrika, ayaa ku baaqay in wada-hadal lagu xalliyo khilaafka dastuuriga ah si nabad ah.
