waa maanso soo baxday 07.11.1990kii kana hadlaysa xukunkii jiray markaa samiirina waxay eray bixin u tahay dawladnimada waana inan aad u qiimo badan oon la talinaayey wakhtigaa iyo aragtidayda
samiiraay waxaan
kugu soorayaa
sarbeeb maanso liyo
murti soohan iyo
tix saadaal wadiyo
gabay samo hor kaca
hees kugu saliman
iyo weliba sowd
sooyaal runtii
taariikh saafi ihi
sal u tahay hidiyo
dhaqankii sabaan
ka sabaan hablaha
sowracow ahaa
wakhtigii sangaha
iyo boqolka siman
layska siin jiree
sumadow ahaa
sebenkay habluhu
qaalinimo siteen
waxaan kuu sidaa
oon ku siinayaa
talo suubanoo
aad sahayatoo
dhaxal baan sidaa
sitaac kuu noqdiyo
sadbursiinyo weedh
saami kuugu filan
wakhti soo socdiyo
xili aan qof sugin
saatirkuna ogyahay
adna kaa sirgacan
siduu kaad jeclayd
saygaa rumaad
kuu siiyayee
calaf kuu sidkee
sunahaaga guur
sababtow ahaa
saqda dhexe hurdada
kuugu salalayee
saacadii walbiyo
sebenkii kastaba
kuu sabaali jiray
marka aad sardhada
isa soo rogtaba
niyad saafiyiyo
gacan suubanuu
kugu seexin jiray
kol haduu safruu
socdaal dheer u baxay
sahan tegay garaad
dhex saqaafayee
u surmiyey dartaa
saxare iyo guban
safiyaan inaan
cidi kaa sarayn
sifahaa masuul
xilka saaranyoo
saaxiibnimo darteed
saacidaan ahee
sidradiyo anoon
seeraha xaqa ah
sina uga baxayn
cidna aan sirayn
yaan ku siinayaa
sumaduhu i faray
adiguna sahwiga
sakalaha wakhtiga
sebenkiyo arlada
inta subax beryaba
siidhigu u dhaco
haku sugin indhaha
niyadana ha siin
qalbigana ka saar
saxalkiyo xumaha
haka samir daraan
surma seegtaliyo
suuraaf ha noqon
sal fudaydku hodo
sug jawaabta maqan
suuradana indhuhu
siyar how bogtaan
ruuxow sadee
sitimaano dhawr
soomalhaad ha gelin
sed baan kula rabaa
samiiraay inaad
gabdha sebenka jira
ka saraysidoo
uunka kuwa siqee
sahashiga ku gala
suuqyada madow
ayaan suubaneey
saxarlaay dhabtii
kaaga seerayaa
siliciyo dhibkiyo
sedka murugaday
la saqaafayaan
ood ka samo baxdoo
siriq aadan gelin
waxaan saajaceey
samiiraay dartaa
kuu siraaday nuur
shamac aan sidoo
sohda ceelka iyo
inaad sabo qabow
ku sugnaatidoo
dalsan saajaceey
nabad kuu sidiyo
seermowaydo roob
marso uu suntiyo
sinta hogol ka raran
heegaan laga surmiyin
dhulka simay xareed
saar iyo ugbaad
deegaan samiyo
daaq iyo sedba leh
oon saboodhin iyo
sufur aan lahan
siigo iyo boodh
abaar soohata ah
baahi laga sargaxo
arad wada sanga ah
seef udub u degay
inaad saakineey
ku sugnaatidoo
sedbursiinyadaa
salkow dhigatid libin
waa kuu siraad
inta mudan salcaan
intuu safay wakhtigu
inta uu silsilad
iyo saymo adag
uu ka sudhay lugaa
inta uu saq dhexe
samadow la kacay
sanqadh li’i la miray
inta saaran ciil
ee la soogan howl
inta soomalhaad
samiiraay ku nool
ee solaygu dubay
inay saxal baxaan
siibaan hargaha
saamaha huqleey
huga sii gurxame
siiyaa ku noqoy
saymaha la bood
sambabada ku nool
sarajoog ragbaa
uga soomay jiif
soogan aawadaa
nimanbaa salaan
iyo soo dhawayn
saado iyo khayr
sacabada u tumay
salaan dheer u koray
samiiraay runtii
kuma seeganayn
dulqaadkiyo samaha
samirkaad wakhtiga
sagal kuu curtiyo
dirir galay sagaal
dayr smalahiyo
saqda dhexe gudgude
dhulka wada simiyo
saxan saxada mayay
seerma waydo roob
dhulka biyo simsima
saad iyo ugbaad
aad ku saadisoo
dhaaxaad sugtee
salma dhiga hashii
hadba joogtay seben
sidigtana lahayd
saakaba wataa
in sibraaro wayn
loo sameeyo iyo
sumad bay rabtaa
lagu sooco oo
sowjaray rabtaa
samiiraay u gala
gaadh iyo senteri
samiiraay milgaha
saatirkayna lihi
samay kuugu mudo
lama saydhiyee
ducaa lagu sidkaa
allow nagu sugoo
noo siyaadi baa
sowd lagu naqaa
samiiraay haniyo
sharaf suubanoo
sodohnimo dhigeed
aad sahayataa
suno weeye adag
ha u bogin surmiga
inta saro qurxoon
lagu xidhay sitaac
sawirada bah guba
shanta golaha sare
ay dul sudhan yihiin
ay ka soogantee
ka sanaadhayaan
erayada sirgacan
niyadana ha siin
qalbigana ka saar
fooq iyo sar dheer
fiilo iyo sawaxan
waxaad saakintaa
caws sideedle iyo
sadexliyo alool
kebed soohan iyo
saab iyo udbiyo
dhigaad suugisiyo
yeel iyo sin qabad
samiiraay hugana
saakiyo garays
shaahd iyo surwaal
goono aan sibraha
qarinayn sinaba
haysu saarin gelin
suuqna hawla bixin
waxaan kugu sidkaday
samiiraay dawari
sadex qayd dhacliyo
boqor suuban iyo
saaqaay maqfiyad
dhaqankii sinjiga
soomaaliyeed
ay siteen habluhu
ee ab soo jireen
alla mahad leh
abwaan maxamed yaasiin maxamed ilkacase
