Hargeysa July 05,2013(SDN)-Guddoomiyaha xisbiga mucaaridka ah ee UCID Eng. Faysal Cali Waraabe ayaa si weyn u dhaliilay Xeerka Maamuuska ee gollaha Wakiilada Somaliland ansixiyeen.
Guddoomiyaha ayaa sidaa ugu waramay jariirada xukuumadu leedahay ee DAWAN hadaladiisiina waxa ka mid ahaa “Waxaan u arkaa in golahaasi uu yahay gole wakhtigiisii dhamaaday, waxay arrintoodu la mid tahay ninkii yidhi Hooyadeen indho la’aan ma ku taqaanay, dad cuna way ku darsatay, muddo korodhsigii xaaaraanta ahaa waxay ku darsadeen inay yidhaahdaan cashuurtii dadka shacabka ah laga soo ururiyay hanala siiyo xataa marka aanu meesha ka tagno lacagtaasi halana siiyo. Waxaas oo kale meelna kama dhacdo aduunka inta gole baarlamaan jirta, Waxaan aduunka lagu arag ayaa meesha socda, waana nasiib darro, waxaanay ka mid tahay nidaam darada maanta dalka ka taagan, nasiib darooyinka wadanka haysta ta ugu wayni waa golaha wakiilada.
Danbiga aniga ayaa wax wayn ku leh, qasaarahaa iyo dhibaatadaa uu maanta golahaasi gaadhsiiyay qaranka inteeda badan anigaa leh, maxaa yeelayanaa odaygii hore ee golihii beelaha ku yimid meesha ka saaray, kaasi oo ka fiicna marka loo eego kan, guddoomiyahan imika golaha wakiilada joogana anaa dadka dusha kaga keenay, markaa danbigaa wax badan baan ku leeyahay, shacabka reer Somaliland cafis ayaan idin waydiisanayaa.
waxaas oo dhibaato ah waxaa ka masuul ah guddoomiyaha golaha wakiilada, waxaas oo kale in mooshinka la geliyo ma aha xeerka marka ay dawladu soo qorto, waa la diidaa ama waa la ogolaadaa, markaa ma aha inay ku darsadaan wax iyaga u dan ah, inuu kaba saaro ayay ahayd, mooshinka guddoomiyaha goluhu qodobadaa sheegaya, dantooda gaarka ah ee aan dastuurigana ahayn. Waxaa jira guri loo dhisayo guddoomiyahan golaha wakiilada, weligeed ma dhicin sharcina ma aha guddoomiye gole oo guri loo dhiso, wuxuu leeyahay dawlada ayaa noo iibisay, hadana magaciisa ayaa lagu qorayaa.
Arrintaasi waa mid u baahan inuu shacabku ka gil-gisho, madaxweynaha iyo golaha guurtidana waxaan leeyahay waxaasi sharci ma aha ee ha saxeexina, waana u caado marka ay dawladu soo saarto mashruuc inay wax ku darsadaan golaha wakiiladu, waayo xeerkaas loo bixiyay shir-qool 14-aad ayay ku shaqaynayeen saddexdaa sanadoodba”Ayuu yiri Guddoomiyaha UCID.
SDN-Hargeysa
contact@somalidiasporanews.com
