Hargeysa Nov 17,2012(SDN/Hubaal)- Sheekh Aadan Maxamuud Xiiray (Aadan-Siiro) oo kamid ah Culimaa’udiinka waaweyn ee reer Somaliland ayaa naqdiyey qaar kamid ah culimadda diinta ee dalka. Sheekha ayaa shalay khudbadii jimcaha ee Masaajidka Quba ee Magaalada Hargeysa, kusoo qaaday in Culimada qaarkood ay ka soo horjeedaan doorashooyinka,kuwaasoo aan ka talinayn nabada iyo xasiloonida wadanka.
“Bahashaa doorasho ah annagu dadka taageera ayaanu ka mid nahay, kuwa ka soo horjeeda, kuwa xaraantinimaynaya ee gadhka ula baxay waxa aanu haynin ee dawlad la’aanta ka faa’iidaysanaya, Jimcihii dhaweyd idin lamaan joogin ee Masaajid halkaas ah ayaan ku tukaday halkaas tagoo waxa uu leeyahay doorashdu waa xaraan, kuwa ku dhex jiraa waa xaraan qaabka ay u dhacaysaa waa xaraan dadkii wada Gaalo ayuu ka dhigayaa , hadda Masaajidkii baan sidaas u fadhiyaa markii uu dhameeyay ayaan ku idhi waaryaa Aw gadhle horta kuba garanmaynee adigu ma samada ayaad ka soo dhacday meeshan Somaliland-baa la yidhaahdaa, adeerka nin walba Qorigiisiibu haystaaye maxaad Daliil u haysaa ma in ay isdilaan baad doonaysaa , Wadaadka kasta oo Kitaabka kasta haystaa ma sheegi qaabkaa u doorta“ ayuu yidhi Sheekh Aadan Siiro.
Sheekh Aadan Siiro waxa uu ugu baaqay axsaabta tartamaysa in ilaaliyaan dhaqanka iyo Diinta wakhtiga uu ololuhu socdo. “ Dadka waxa aynu ku waaninaynaa doorashada la is doorto si aynu u kala nabadgalno weeyer macnaheedu ,laakiin ha ilaaliyo Diinteena ha ilaaliyo Dhaqankeena ha ilaaliyo karaamada hablaheena , khasaaraha ha la yareeyo”
SDN-Hargeysa
contact@somalidiasporanews.com
