Mulkiilaha Wargeyska Ogaal Oo Xarunta C.I.D-da Looga Yeedhay Iyo Nuxurka Eedaha Loo Haysto
Hargeysa:Aug,31,2015(SDN/QJ)-Muuse Faarax Jaambiir oo ah Mulkiilaha Wargeyska Ogaal ee kasoo baxa Magaalada Hargeysa, ayaa Xalay fiidkii hore looga yeedhay Xarunta Ciidamada Dembi-baadhista C.I.D-da, iyagoo wax ka weydiiyey warar la xidhiidha Wareejinta Haamaha Shidaalka Berbera oo Wargesku Maalintii shalay uu qoray.
Guddoomiyaha Wargeyska Ogaal Muuse Faarax Jaambiir oo shabakadda Somalilandpost.net wax ka weydiiyey arrintan, ayaa sheegay inay Xarunta Wargeyska yimaaddeen ciidammo ka tirsan Laanta Dambi-baadhista gelinkii hore ee maanta oo aanu isagu ku sugnaynd Xafiiska, balse ay caawa Fiidkii yimaaddeen Xarunta, kuna wargaliyeen in looga baahan yahay Xarunta Ciidanka Dambi-baadhista si wax looga weydiiyo wararkaas Wargeysku Qoray.
“Hadh soo korkii ayaa la ii sheegay in xafiiska Ogaal ay ciidanka C.I.D yimaadeen, kaddib waan la xidhiidhay, waxaanan waydiiyay waxay u socdeen, waxay ii sheegeen inay doonayaan maamulka, markaa ma nasoo mari kartaa ayay igu yidhaahdeen, aniguna waxaan u sheegay in aan u iman doono berri, haddii kale ay galabnimada noogu yimaadaan xafiiska.” Sidaa waxa yidhi Gudoomiyaha Wargeyska Ogaal Muuse Faarax.
Wuxuu intaa ku daray oo uu yidhi gudoomiyuhu; “Fiidkii caawa(xalay) ayaa sarkaal ka socda C.I.D noogu yimi xafiiska, wuxuu sitay warqad yeedhmo ah oo maxkamaddu soo qortay. Markaa anagoo wada joogna ayaa sarkaal ka sareeyay nala soo xidhiidhay, waxaanay naga codsadeen in aanu xafiiskooda u raacno, siday doonayeen baanu u yeelay, markaan tegay xafiiskoodana waxay wax iga waydiiyeen warar wargeysku ka qoray arrimaha wareejinta haamaha iyo kartoonka Carraale Waddani ee wargeyska ku soo baxa, aniguna waxaan ugu jawaabay wixii wargeysku qoray waa intaa aad haysaan.” Sidaas ayuu yidhi Guddoomiyaha Ogaal oo arrintan aanu wax ka weydiinnay.
Gudoomiyuhu wuxuu intaa ku daray in arrintoodu baadhis kiis la xidhiidho, isla markaana uu xog ku helay in dacwaddani ka timi dhinaca madaxtooyada oo ay la xidhiidho warar iyo dareenada shacabka ee la xidhiidha mawduuca Haamaha oo uu baahiyay.
Wargeyska Ogaal ayaa todobaadkii hore baahiyey Xogo la xidhiidha in xukuumaddu ku wareejinayso Haamaha Keydka Shidaalka ee Berbera shirkado gaar loo leeyahay oo qaarkood lagu xidhiidhiyey inay iska leeyihiin ama Saamiyo ku leeyihiin masuuliyiin ka tirsan Xukuumadda madaxweyne Siilaanyo.
Wasiirka Ganacsiga oo isaguna maalintii shalay ka hadlay arrintan, ayaa sheegay inuu jiro heshiis qorshihiisu qabyo yahay oo Xukuumaddu ku doonayso inay Haamaha Keydka Shidaalka ee Berbera kaga kirayso isla markaana maamulkooda ku wareejiyo Shirkadaha dalka keena shidaalka oo markii hore laga qaadi jiray khidmadda Haamaha iyo Cashuurta ku waajibtay.
Xigasho SOMALILANDPOST.NET.
SDN./QJ
Contact@somalidiasporanews.com